Sendra anao

Rehefa sendra iny
mitopy amin' ny fiainana
ny fiainantsika roa,
Dia zary randran-droa
ny filonjy sy fisainana;
Dia mampidongy fo
ny fotoana izay iainana
tsy miaraka aminao ...
      Rehefa sendra koa
      ka misy ny tohanana
      misakan-dalana ao,
      mainka toa fiolanana
      manakaiky hatrany
      ny eo anilanao!
      F' impiry moa izao
      ny ankaso sy ny sedra
      no sendra antsika roa
      kanefa tsy nahavoa ...
      Mantsy nampiiba
      ny ledaledan' afo
      sy ny langolangom-po
Fa kisendrasendra mamiko
sy rendrarendram-poko
ilay segondra iray
Segondra fa tsy foiko
Segondra izay inoako
ary hikaloiko ny hoe:
"AHY IRERY IANAO"
... Ahy mantsy ianao!
Dia ho rava ny tontolo,
Hifarana ny andro!
Ary isika sisa
Tena isika irery no handova paradisa
Satria mifankatia

                           Andon' Ny Aina